ഈ വർഷം ഭക്ഷ്യധാന്യക്കെടുതി രൂക്ഷമാകുമെന്ന് ഐക്യരാഷ്ട്രസഭയുടെ കീഴിലുള്ള ഫൂഡ് ആന്റ് അഗ്രികൾചർ ഓർഗനൈസേഷൻ മുന്നറിയിപ്പു നൽകുന്നു. ജനുവരി മാസത്തെ അപേക്ഷിച്ച് വളരെ ഉയർന്ന തോതിലുള്ള വിലക്കയറ്റമാണ് ഭക്ഷ്യധാന്യങ്ങൾക്ക് ഉണ്ടായിരിക്കുന്നത് എന്ന് മാര്ച് 3 വ്യാഴാഴ്ച പുറത്തിറക്കിയ റിപ്പോർട്ടിൽ എഫ്.എ.ഒ പറയുന്നു. ജനുവരിയിലെ 231 പോയന്റിൽ നിന്ന് 236 പോയന്റിലേക്ക് ഉയന്നാണ് ഫെബ്രുവരിയിൽ ലോക ഭക്ഷ്യവിലനിലവാരം റെക്കോർഡ് ഭേദിച്ചിരിക്കുന്നത്. ഇത് ഇനിയും ഉയരാനുള്ള സധ്യതയും എഫ്.എ.ഒ ചൂണ്ടിക്കാട്ടുന്നുണ്ട്. എണ്ണവിലയിലുണ്ടായ കുതിച്ചു ചാട്ടവും ഭക്ഷ്യധാന്യ ശേഖരത്തിലുള്ള കുറവുമാണ് ഇതിനുള്ള കാരണമായി അവർ പറയുന്നത്.
പാലുല്പന്നങ്ങൾക്ക് കഴിഞ്ഞ മാസം 4 ശതമാനവും ഭക്ഷ്യധാന്യങ്ങൾക്ക് 3.7 ശതമാനവും മാംസത്തിന് 2 ശതമാനവുമാണ് വിലക്കയറ്റം അനുഭവപ്പെട്ടത്. അമേരിക്കയിൽ ചോളം എഥനോൾ ഉല്പാദനത്തിനു വേണ്ടി വൻതോതിൽ ഉപയോഗിക്കുന്നതും ഭക്ഷ്യധാന്യ ക്ഷാമത്തിന് കാരണമായി പറയുന്നു. എണ്ണവിലയിലുണ്ടാവുന്ന വർദ്ധനവ് വളത്തിന്റെ വിലയിലും ഗതാഗതച്ചെലവിലും വർദ്ധനവുണ്ടാക്കുന്നു. ആഫ്രിക്കൻ രാജ്യങ്ങളിലാണ് വിലക്കയറ്റം ഏറ്റവും രൂക്ഷമാവുന്നത്.
കാർഷികമേഖലയിലും മറ്റിടങ്ങളിലെ പോലെ ശാസ്ത്രസാങ്കേതിക വിദ്യകൾ വളരെയേറെ പുരോഗതി പ്രാപിച്ചിട്ടും ലോകം ഇന്നും ഭക്ഷ്യധാന്യക്കമ്മി നേരിടുന്നത് എന്തു കൊണ്ട്?
എഫ്.എ.ഒയുടെ മുന്നറിയിപ്പ് ഗൌരവത്തിലെടുത്ത് ആവശ്യമായ മുൻകരുതലുകളെടുത്തില്ലെങ്കിൽ ഇന്ത്യയിലെ വിലക്കയറ്റം ഇനിയും രൂക്ഷമാകും. ദശകോടീശ്വരന്മാരുടെ ആസ്തിയോടൊപ്പം ദശകോടികളുടെ പട്ടിണി മരണത്തിനും സാദ്ധ്യതയുണ്ട്. രാഷ്ട്രസുരക്ഷ എന്നാൽ അതിർത്തിസംരക്ഷണം മാത്രമല്ല എന്നും രാഷ്ട്രത്തിനകത്തെ ജനങ്ങളുടെ സുരക്ഷ കൂടിയാണെന്നും നമ്മൾ ഇനിയെങ്കിലും തിരിച്ചറിഞ്ഞേ മതിയാകൂ. ഉല്പാദനം വർദ്ധിപ്പിച്ചതു കൊണ്ടു മാത്രം കാര്യമായില്ല അത് നീതി പൂർവമായി വിതരണം ചെയ്യുക കൂടി വേണം. എന്നാൽ മാത്രമേ ദാരിദ്ര്യത്തെ ഇല്ലായ്മ ചെയ്യാനാകൂ. ഒരിടത്ത് കുമിഞ്ഞു കൂടുന്ന സമ്പത്ത് മറ്റൊരിടത്തു നിന്ന് കോരിയെടുക്കപ്പെടുന്നതാണെന്ന് നാം ഇനിയെങ്കിലും തിരിച്ചറിഞ്ഞേ മതിയാകൂ. ശമ്പള പരിഷ്കരണം നടത്തുമ്പോഴും തൊഴിലുറപ്പു പദ്ധതിയുടെ കൂലി വർദ്ധിപ്പിക്കുമ്പോഴും വിലവർദ്ധനവിനെ പിടിച്ചു നിർത്തുന്നതിനുള്ള പദ്ധതികൾ കൂടി ആവിഷ്കരിക്കേണ്ടതുണ്ട്. എങ്കിൽ മാത്രമേ കൂടിയ വേതനത്തിന്റെ ഗുണം അവർക്കു ലഭിക്കുകയുള്ളു. അല്ലെങ്കിൽ ദശകോടീശ്വരന്മാരുടെ ആസ്തി (ആർത്തി) വർദ്ധിപ്പിക്കുന്നതിനു മാത്രമേ ഈ പരിഷ്കരണങ്ങൾ കൊണ്ടു സാദ്ധ്യമാകൂ.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ